Azərbaycan, Bakı, 10 iyul /Trend, müxbir Zülfiyyə Qurbanova/
Dünya Bankı iyulun 15-də Azərbaycanda "Milli su təchizatı və kanalizasiya xidmətləri" layihəsinin reallaşdırılmasına əlavə vəsaitin ayrılmasını bəyənəcək.
Bankın Bakı nümayəndəliyindən Trend-ə verilən məlumata görə, əlavə maliyyə qrafikə uyğun olaraq bəyəniləcək və bu prosesdə heç bir problem yoxdur.
Dünya Bankı Azərbaycanda "Milli su təchizatı və kanalizasiya xidmətləri" layihəsinin reallaşdırılmasına 150 milyon dollar məbləğində əlavə vəsait ayırmağa hazırlaşır. Azərbaycan hökumətinin bu layihədə payı 83 milyon dollar olacaq. Əlavə maliyyələşdirmə çərçivəsində layihənin fəaliyyət müddəti 31 dekabr 2017-ci ilədək uzadılacaq.
İyulun 10-da Dünya Bankının Direktorlar Şurası Beynəlxalq Yenidənqurma və İnkişaf Bankının xətti ilə ayrılan 100 və 50 milyon dollar məbləğində kreditlərin təqdim edilməsini bəyənib. Kreditlər müvafiq olaraq "Məhkəmə xidmətləri və "ağıllı" infrastruktur" (JSSIP) və "Azərbaycanda kənd investisiyaları" (AzRIP) layihələrinin maliyyələşdirilməsinə yönəldiləcək.
