Azərbaycan, Bakı, 8 sentyabr /Trend, müxbir İlahə Məmmədli/
Dünya Bankı (DB) Azərbaycanda yeni "Regional yol" layihəsinin qiymətləndirilməsinə başlayır. Bank bu layihənin reallaşdırılmasına 250 milyon dollaradək vəsait ayırmağı planlaşdırır. Bu barədə bazar ertəsi Trend-ə DB-nin Bakı nümayəndəliyindən bildiriblər.
Nümayəndəlikdən qeyd ediblər ki, ölkədə yol layihələrinin rəhbəri Jak Bürenin başçılığı ilə bankın qiymətləndirmə missiyası sentyabrın 10-da Bakıya gəlir: "Sentyabrın 18-dək davam edəcək səfər zamanı missiya təqvim ilinin sonunadək başa çatdırmaq üçün layihənin hazırlanmasına başlayacaq".
İlkin məlumata görə, bankın Direktorlar Şurası tərəfindən kreditin bəyənilməsi cari il oktyabrın 16-na planlaşdırılıb. Lakin bankdan deyiblər ki, bu tarix indikativdir, layihənin hazırlanması isə 2014-cü ilin sonundan tez başa çatmayacaq. Direktorlar Şurası tərəfindən layihənin təsdiq edilməsi cari maliyyə ili ərzində gözlənilir.
DB-nin maliyyə ili 2015-ci il iyunun 30-da yekunlaşacaq.
