Azərbaycan, Bakı, 29 sentyabr /Trend, müxbir Azad Həsənli/
Azərbaycan hökuməti Ümumdünya Ticarət Təşkilatının (ÜTT) Katibliyinə təşkilatın üzv ölkələrinin suallarının cavablarını təqdim edib. Bunu bazar ertəsi Trend-ə danışıqlar qrupunun rəhbəri, xarici işlər nazirinin müavini Mahmud Məmməd-Quliyev deyib.
O, qeyd edib: "Biz işçi qrupu ilə sonuncu görüşdən sonra ÜTT-yə üzv ölkələrin Azərbaycana təqdim etdiyi sualların cavablarını göndərmişik. Təşkilatın Katibliyi danışıqların növbəti raundunun keçirilmə tarixini təxmini olaraq 2014-cü ilin I rübünə təyin edib".
ÜTT Katibliyi bu sualların əsasında "Factual Summary" icmal hesabatını hazırlayacaq. Hesabat təşkilatın üzv ölkələrinə göndəriləcək. İşçi qrupu ilə sonuncu görüş bu ilin iyun ayında Cenevrədə keçirilib. Ümumilikdə yayda 12 ölkə ilə ikitərəfli danışıqlar aparılıb.
Nazir müavininin sözlərinə görə, Honduras artıq təkliflərini Azərbaycana göndərib, Malayziyadan da təkliflərin alınması gözlənilir.
Kənd təsərrüfatına daxili dəstək məsələləri üzrə çoxtərəfli danışıqlar üçün Azərbaycan da ÜTT Katibliyinə 2011-2013-cü illərdə ölkənin aqrar sənaye kompleksində dəyişikliklər nəzərə alınmaqla yeni cədvəl göndərib.
