Azərbaycan, Bakı, 21 noyabr /Trend, müxbir Azad Həsənli/
Azərbaycanda qızıl istehsalı ilə məşğul olan "Anglo-Asian Mining plc" şirkəti Türkiyənin "Yilmaz Proses Teknolojileri Detay Mühendislik Madencilik Danışmanlik İnsaat Limited STI" (YPT) şirkəti ilə mis və qiymətli metalların istehsalı üzrə flotasiya qurğusunun tikintisinə dair müqavilə imzalayıb.
Trend xəbər verir ki, bu barədə cümə günü şirkətin saytında dərc olunmuş məlumatda deyilir.
Məlumatda qeyd olunur ki, müqavilənin dəyəri 2,7 milyon dollar, flotasiya qurğusunun tikintisi üzrə ümumi xərclər isə 3,5 milyon dollardır.
Flotasiya qurğusunun istismara verilməsi 2015-ci ilin üçüncü rübünə planlaşdırılıb. Onun istehsal gücü saatda 20 ton filiz təşkil edəcək.
ААМ 2013-cü ildə adıçəkilən Türkiyə şirkəti ilə 7 milyon dollar dəyərində qələviləşdirmə qurğusunun tikintisi üzrə əməkdaşlıq edib.
Məlumatda deyilir: "Ödəniş mərhələli şəkildə 2,75 milyon dollarlıq akkreditivin təqdim olunması yolu ilə həyata keçiriləcək. Bunun üçün həmin akkreditivin 1 ildən 2 ilədək müddətə maliyyələşdirilməsini təmin etmək üçün "Paşa Bank" ASC ilə müqavilə imazlanıb".
Hazırda şirkətin yüksək tərkibli misə malik sulfid filiz ehtiyatları 379 min tondur. Bir tonun tərkibində qızılın orta həcmi 2,12 qram, gümüş - 20,2 qram, mis isə 0,61 qramdır.
Xırdalandıqdan sonra filiz yeni flotasiya qurğusunda emal olunacaq. Şirkətin məlumatına görə, il ərzində filiz emalından əldə olunan mənfəət "Paşa Bank"ın kreditini ödəmək üçün yetərli olacaq.
Qeyd edək ki, May ayında AAM və İsveçrənin "Industrial Minerals SA" qrupu "Gədəbəy" yatağında hasil olunan mis konsentratının satışı ilə bağlı müqavilə imzalamışdılar.
