Dünya Bankının (DB) baş iqtisadçısı Kristos Kostopolus və məsləhətçi Mənsur Farsad 2-ci "Azərbaycanın institusional quruculuğuna texniki yardım" (IBTA-2) layihəsinin başa çatması ilə əlaqədar yekun hesabat hazırlamaq üçün mayın 28-də Bakıya gəlir. Layihənin gerçəkləşdirmə qrupundan Trend ə verilən məlumata əsasən, iyunun 12-dək davam edəcək səfər zamanı bankın ekpertləri layihə benefisarları ilə görüşəcək. Layihənin əsas benifisarı Maliyyə Nazirliyidir.
Yekun hesabatın hazırlanmasına cəlb olunmuş Baker Tily London auditor şirkətinin Gürcüstan bölməsi artıq işi başa çatırıb və Azərbaycan tərəfinin bəyəndiyi sənəd DB-nın təsdiqinə göndərilib.
2006-cı ilin iyunun 30-da IBTA-2 layihəsinin başa çatması ilə əlaqədar gerçəkləşdirmə qrupu da ləğv ediləcək. Belə ki, layihənin restrukturlaşdırılmış hissəsi quş qripi ilə mübarizəyə yönəldilib ki, bu da Kənd Təsərrüfatı Kreditləri üzrə Dövlət Agentliyinə aiddir.
İBTA-2 layihəsinin ümumi dəyəri $10,6 mln olduğu təqdirdə $5,1 mln. vəsait istifadəsiz qalıb və quş qripi ilə mübarizəyə yönəldilib.
İBTA-2 2002-ci ildə təsdiqlənib. Layihə əvvəl nəzərdə tutulmuş 10 elementdən cəmi 4-nü əhatə edib. Həmin elementlərə dövlət idarəçiliyinin gücləndirilməsi, dövlətin maliyyə xərclərinə nəzarət, sosial xərclər sahəsində islahatlar və mühasibat uçotu və audit sahəsində qanunvericiliyin təkmilləşdirilməsi yolu ilə institusional potensialın gücləndirilməsi daxildir.