İyulun 13-15-də Tbilisidə Qars-Axalkalaki-Tbilisi-Bakı dəmiryolunun açılış layihəsi üzrə Azərbaycan, Gürcüstan, Türkiyə və Qazaxıstanın nəqliyyat nazirlərinin görüşünə hazırlıq üzrə işçi qrupun iclası olacaq. Bu barədə Trend ə Azərbaycanın Dövlət Dəmir yolu İdarəsindən xəbər veriblər.
Ekspertlərin görüşündə Azərbaycanın nümayəndə heyətinə nəqliyyat nazirinin birinci müavini Musa Pənahov başçılıq edəcək.
Qars-Axalkalaki-Tbilisi-Bakı layihəsi üzrə nəqliyyat nazirlərinin görüşü bu ayın sonuna qədər Qazaxıstanda keçiriləcək. Görüşlərin Qazaxıstanda keçirilməsi bu ölkənin layihədə iştirak etməkdə maraqlı olması ilə izah olunur.
Gürcüstan tərəfi layihə üzrə təkliflər hazırlayıb, lakin bu təkliflər hələ tərəflərə təqdim olunmayıb. Layihənin texniki-iqtisadi əsaslandırılmasının son variantı Qazaxıstanda keçiriləcək nazirlərin görüşündə müzakirə olunacaq.
Qars-Axalkalaki-Tbilisi-Bakı dəmir yolu nəqliyyat dəhlizinin yaradılma layihəsinə 98 km uzunluqda Qars-Axalkalaki dəmir yolu qolunun tikintisi daxildir. Bunun 68 km-i Türkiyə ərazisinin, 30 km-i isə Gürcüstan ərazisinin payına düşür. Həmçinin Axalkalaki- Tbilisi sahəsində müəyyən yenidənqurma işləri aparmaq lazımdır. Layihənin orta qiyməti 400 milyon ABŞ dolları məbləğində qiymətləndirilir.