Əhalinin Dövlət Sosial Müdafiə Fondu pensiya və müavinətlərin verilməsi üçün Azərbaycanın regionlarında quraşdırılmalı olan bankomatların yerini müəyyənləşdirib. Bu barədə, Trend agentliyinin məlumatına əsasən, fondun rəhbəri Səlim Müslimov bildirib.
Bankomatlar rayon mərkəzlərində 5, 10 və 15 km aralıda yerləşən yaşayış məntəqələrində, iri kənd və qəsəbələrdə quraşdırılacaq. S.Müslimovun sözlərinə görə, bu aparıcı sistem pensiya alan bütün vətəndaşları əhatə etməlidir. Hazırda banklarla birgə araşdırmalar aparılır, çünki bu məsələ xərc tələb edir. Hər bankomatın qiyməti $30-$35 min təşkil edir. Bundan əlavə, bankomatların gələcəkdə elektrik enerjisi və rabitə ilə təmin edilməsi lazım gələcək. Hazırda hesablama aparılır.
Hazırda bankomatlardan 5 yeni manatdan az pul verilmədiyinə toxunan S.Müslimov qeyd edib ki, bu, texniki problemdir və kiçik nominallı pul kütləsinin artırılmasından sonra bu məsələ öz həllini tapacaq.
