Azərbaycan prezidentinin Bakı şəhərinin nəqliyyat infrastrukturunun işinin yüngülləşdirilməsi haqqında sərəncamında nəzərdə tutulan, metronun "M.Əzizbəyov" stansiyasından Heydər Əliyev adına beynəlxalq aeroporta qədər uzanan avtomobil yolunun genişləndirilməsi 15- mln. ABŞ dolları məbləğində qiymətləndirilir. Bu barədə Trend ə Azərbaycanın Nəqliyyat Nazirliyinin "Yolnəqliyyatservis" departamentinin başçısı Cavid Qurbanov bildirib.
Onun sözlərinə görə, vəsaitlərin əsas hissəsi yeni yol qovşaqlarının, körpülərin tikintisinə və kommunikasiyanın köçürülməsinə, həmçinin torpağın alınmasına sərf olunacaq. Bu layihənin gerçəkləşdirilməsi zamanı tikililərin sökülməsi və kommunikasiyanın köçürülməsi üzrə böyük işlər nəzərdə tutulub. Yolun özünün tikintisinə isə təxminən 30-35 mln. ABŞ dolları tələb olunur. Bu yolun layihələndirilməsi və tikintisini Slovakiyanın Doprastav şirkəti həyata keçirəcək.
Bu yolda beş qovşağın tikintisi nəzərdə tutulub. Yol 8-12 zolağa qədər genişləndiriləcək. Gələcəkdə H.ƏLiyev adına prospektin genişləndirilməsi və sürəti saatda 120-150 km-ə çatdırmağa imkan verən vahid sürət yolunun yaradılması nəzərdə tutulub.
C.Qurbanovun sözlərinə görə, yalnız metronun "M.Əzizbəyov" stansiyasının yanındakı dairədən sutkada təxminən 220 min avtomobil keçir.