Azərbaycan höküməti və Hollandiyanın Fondel Metal şirkəti arasında "Azəralüminium" SC-nin uzunmüddətli idarəsi haqqında müqavilə pozulduqdan sonra müəssisənin mütəxəssisləri istehsalat həcminin artırılması, texnoloji prosesin və fasiləsiz işin təmin olunması üçün kompleks tədbirlər görməyə başlayıb. "Azəralüminium" öz müəssisələri "Sumqayıt alüminium" və Gəncə giltorpaq zavodu üçün tikinti materiallarının satın alınması üzrə tender elan edib.
Trend in tender komissiyasının məlumatına istinadən verdiyi xəbərə görə, təklifin dəyərinin 2%-i məbləğində bank zəmanətlərinin olduğu tender ərizələri oktyabrın 4-ü saat 17.00-a qədər təqdim edilə bilər. Tender təkliflərinin olduğu zərflər oktyabrın 5-i saat 11.00-da açılacaq.
Tender 4 lot üzrə keçirilir, bura istehsalat əraziləri üçün 150 min kərpicin, Sumqayıt alüminium zavodu üçün isə qeyri-standart lövhələrin, bu müəssisə və Gəncə giltorpaq zavodunun işçiləri üçün payız-qış dövrü üçün xüsusi geyimlərin, eləcə də Gəncə müəssisəsi üçün 2310 ton söndürülmüş əhəngin alınması və tədarük edilməsi daxildir.
Tenderdə iştirak etmək istəyənlər sentyabrın 26-sı saat 17.00-dək iştirak ərizəsi, iştirak üçün məbləğin ödənilməsi haqqında bank sənədi, rekvizitlər, qeydiyyat ölkəsi, hüquqi status və tam ad haqqında məlumat; vergi və digər məcburi ödənişlər üzrə borcların olmaması haqqında vergi orqanlarından arayış; analoji işlərin yerinə yetirilməsində təcrübənin olması haqqında arayışı təqdim etməlidirlər. Tenderin hər bir lotunda iştirakın qiyməti 300 manatdır.
SC-nin planına Gəncə giltorpaq zavodunun istehsalat gücünün bu il 450 min tona, 2007-ci ildə isə 500 min tona qədər artırılması daxildir.
Sumqayıtdakı SC-nin alüminium istehsalı ərazisində də həmçinin istehsalat həcmlərinin genişləndirilməsi nəzərdə tutulub. Sumqayıt zavodunun istehsalat gücü 30 min tondan 60 min tona qədər artırılacaq və bununla əlaqədar yeni sexlər 2007-ci ilin aprel ayında istismara veriləcək. Bunun üçün 27,5 mln. ABŞ dolları həcmində sərmayə qoyulacaq. Hazırda zavodda 861 nəfər işləyir, lakin yeni sexlərin açılması ilə əlavə olaraq 500 yeni iş yeri açılacaq.