"2007-ci ilin dövlət büdcəsi" layihəsi Milli Məclisin payız sessiyasında müzakirəyə çıxarılacaq. Trend xəbər verir ki, üç hissədən ibarət olan sənəd artıq millət vəkillərinə paylanılıb.
Millət vəkilləri layihə ilə tanış olduqdan sonra rəy və təkliflərini Milli Məclisin İqtisadi siyasət məsələləri daimi komissiyasına bildirəcəklər. Onu da qeyd edək ki, layihə əvvəlcə adıçəkilən komissiyada müzakirə olunduqdan sonra parlamentin müzakirəsinə təqdim ediləcək.
Qeyd edək ki, prezident İlham Əliyev "2007-ci ilin dövlət bödcəsi" layihəsini təsdiq edərək parlamentə göndərib. 2007-ci ildə dövlət bödcəsinin gəlirləri 5 335 700 min. AZN, xərcləri isə 5 714 700 min. AZN təşkil edəcək. Büdcənin mərkəzləşdirilmiş gəlirləri 5 169 173,9 min AZN, yerli gəlirləri 166 526,1 min AZN, mərkəzləşdirilmiş xərcləri 4 986 594,8 min AZN, yerli xərcləri isə 728 105,2 min AZN məbləğində təsdiq edilib.
Gələn ilin dövlət büdcəsinin xərclərinin 3 548,3 mln. AZN-i cari xərclər, 2 122,4 mln. AZN-ni əsaslı xərclər, 44 mln. AZN-ni isə kreditlər və faizlərə xidmətlə bağlı xərclər təşkil edir. Dövlət büdcəsi kəsirinin yuxarı həddi 379 min AZN məbləğində təsdiq edilib ki, bunun da maliyyələşdirilməsi özəlləşdirmədən daxilolmalar, dövlət istiqrazlarının ölkə daxilində və xaricində yerləşdirilməsi və digər mənbələr hesabına həyata keçiriləcək.