Yoxsulluğun azaldılmasına yardım üzrə layihənin gerçəkləşdirilməsinə dair hesabatı müzakirə etmək üçün Dünya Bankının (DB) Azərbaycan üzrə aparıcı iqtisadçısı Kristos Kostopolusun oktyabrın 30-dan Bakıya səfəri başlayır. Bankın Bakı ofisindən Trend ə verilən məlumata görə, AR hökumətinin qalan iki tranşın alınmasından imtina etməsi ilə əlaqədar layihə 2006-cı ilin iyununda başa çatıb. Layihənin dəyəri 60 mln. SDR təşkil edib. Bu vəsaitlərin üç tranşla alınması planlaşdırılıb. Və onlar büdcə kəsirinin bağlanmasına yönəldilib. Amma ölkə təkcə bir tranşı (20 mln. SDR) alıb.
DB ekspertinin səfəri çərçivəsində ümumiqtisadi təhlil aparılacaq. Hökumətlə 2007-ci il üçün makroiqtisadi və fiskal göstəricilər üzrə proqnozlara, dövlət investisiyalar proqramına baxılacaq.
K.Kostopolusun səfəri noyabrın 10-dək davam edəcək.