Respublika üzrə torpaq kadastrının yaradılma layihəsi çərçivəsində kredit sazişi üzrə Azərbaycan höküməti və Dünya Bankı arasında rəsmi danışıqların ilkin müddəti 2007-ci il fevralın əvvəlinə təyin olunub.
DB-nin Bakı nümayəndəliyindən Trend ə verilən məlumata görə, hazırda layihənin rəhbəri Qeyvin Adlinqtonun (bankda torpaq administrasiyası üzrə mütəxəssis) başçılıq etdiyi Dünya Bankının missiyasının apardığı qiymətləndirmənin nəticələri sona çatır. Missiya işini dekabrın 13-də başa vurub.
İlkin məlumatlara görə, layihənin dəyəri əvvəlki 42 mln. ABŞ dollarından 40 mln. ABŞ dollarına qədər azaldılıb. DB və Azərbaycan hökümətinin kreditinin payı rəsmi danışıqlar zamanı qəti şəkildə razılaşdırılacaq, lakin nümayəndəlikdə DB-nin kreditinin həcminin 30 mln. ABŞ dollarına qədər olacağı istisna olunmur.
Kredit 2007-ci il mart ayının sonunda bankın Direktorlar şurasında təsdiq olunacaq.
DB layihəsi respublika üzrə qeydiyyatın bütün sistemini əhatə edəcək, lakin onun çərçivəsində bir neçə pilot layihəsi olacaq.
Layihənin benefisiarları Nazirlər Kabinetinin yanında Daşınmaz əmlakın reyestrinin dövlət xidməti, Torpaq və xəritəçilik üzrə Dövlət komitəsi, Dövlət Əmlakının idarə olunması üzrə Dövlət komitəsi və Ədliyyə Nazirliyi müəyyən olunub. Layihə çərçivəsində daşınmaz əmlakın qeydiyyatı, xəritələrin kadastrının hazırlanması və dövlət əmlakının idarə sisteminin möhkəmləndirilməsi nəzərdə tutulub. Layihəyə cəlb olunmuş layihələrdə keyfiyyətin yüksək səviyyəsini təmin etmək üçün informasiya texnologiyalarının inkişafı nəzərdə tutulur.
