Gələn ilin avqustundan Azərbaycana Fransanın Aerospatiale şirkətinin ATR markalı təyyarələrinin tədarükünə başlanacaq. Bu barədə Trend ə AZAL Dövlət konserninin baş direktoru Cahangir Əsgərov məlumat verib. O qeyd edib ki, cəmi 6 belə təyyarənin alınması nəzərdə tutulur. Tədarüklər 2008-ci ilin avqustuna qədər həyata keçiriləcək. Müqavilənin ümumi məbləği təxminən 92 mln. ABŞ dollarıdır.
Bu təyyarələr respublika daxilində reyslərin həyata keçirilməsi üçün istifadə olunacaq. Bu, 40-50 sərnişinlik kiçik təyyarələr olacaq.
Fransa təyyarələri analoji sinifdən olan digər təyyarələrdən iki dəfə səmərəlidir. Bununla yanaşı, Azərbaycan hələ Ukrayna istehsalı olan təyyarələri almaqdan imtina etməyib. Onlardan biri ötən ilin dekabr ayında qəzaya uğrayıb. Bu, qəzanın səbəbləri haqqında rəsmi rəyin elan olunmasından sonra baş verə bilər.
Qəzanın səbəbləri aydınlaşana qədər "AZAL" AN-140-100 təyyarələrinin alınması və istismarını dayandırıb. AN-140-100 markalı təyyarələr "AZAL" və Xarkov dövlət aviasiya müəssisəsi arasında 8 iyul 2004-cü il tarixində imzalanmış müqavilə üzrə alınıb. Müqavilədə həmçinin uçuş-texniki heyətin təlimi və təyyarələrin texniki dəstəklənməsi nəzərdə tutulub. Müqavilənin qiyməti 36,4 mln. ABŞ dolları (dörd təyyarənin hər biri 9,1 mln. ABŞ dolları) təşkil edir.
