Nəqliyyat üzrə baş mütəxəssis və layihə qrupunun rəhbəri Cerald Olivyenin başçılıq etdi Dünya Bankının missiyası Azərbaycanın dəmir yolu ilə tranzit və ticarətə yardım layihəsi üzrə qiymətləndirmədən qabaqkı işlərə başlayıb. Trend DB-nin Bakı nümayəndəliyinin başçısı Qreqori Yejeyçaka istinadən xəbər verir ki, bank DB-nin Direktorlar Şurasında baxılma prosesini sürətləndirmək niyyətindədir, ona görə də yaxın vaxtlarda layihənin qiymətləndirilməsi həyata keçiriləcək.
Q.Yejeyçakın sözlərinə görə, gələn həftə maliyyələşdirmə, islah edilmə planları ilə bağlı məsələlərə baxılacaq.
Layihədə dəmir yolu ilə sərnişin və yük daşınmalarının restrukturlaşdırılması və ADDY-nin maliyyə menecmentinin beynəlxalq standartlara uyğunlaşdırılması nəzərdə tutulub. Həmçinin ADDY-nin rəqabət qabiliyyətinin yüksəldilməsi, səmərəlilik və kommersiya istiqamətinin yaxşılaşdırılması nəzərdə tutulub.
DB missiyasının səfəri fevralın 8-dək davam edəcək. Layihə 2006-cı ilin əvvəlindən hazırlanır. Yapon hökumətinin PHRD fondundan 900 min ABŞ dollarından çox məbləğdə qrant vəsaitləri üçün məsləhətçilər cəlb olunub və onlar texniki-iqtisadi əsaslandırmanı hazırlayırlar. DB başçısı əmindir ki, 2007-ci ilin iyununa qədər layihə bankın Direktorlar şurasında təsdiq olunacaq.
DB-nin Azərbaycan hökuməti ilə tərəfdaşlıq strategiyasına (2007-10-cu illər) əsasən, dəmir yolu ilə tranzit və ticarətə yardım layihəsi üçün 80 mln. ABŞ dollarının ayrılması planlaşdırılır.
