Azərbaycan, Bakı/ Trend müxbir İ.Xəlilova/ İslam İnkişaf Bankı Azərbaycanda İslam investisiya şirkətinin yaradılması üçün texniki iqtisadi əsaslandırma işlərinin başa çatması barədə İqtisadi İnkişaf Nazirliyinə məlumat verib. Bu barədə şənbə günü iqtisadi inkişaf nazirinin müavini Mikayıl Cabbarov məlumat verib.
"Biz yaxın günlərdə sənədlərin alınmasını gözləyirik. Növbəti mərhələdə isə bankla bilavasitə İnvestisiya şirkətinin yaradılması barədə müzakirələrə başlanacaq", - deyə Cabbarov bildirib.
İslam investisiya şirkətinin fəaliyyəti Azərbaycan şirkətlərinin inkişafında iştirak etmək və iştirakçı payı əldə etməkdən ibarət olacaq.
"Ola bilər ki daha sonra bu paylar satılsın və İslam investisiya şirkəti layihədən çıxsın", - deyə Cabbarov söyləyib.
İnvestisiya fondunun yaradılması barədə təklif 7-9 noyabr 2006-cı ildə Bakıda ərəb institutlarının da iştirak etdiyi beynəlxalq investisiya konfransında İİB prezidenti Əli Məhəmməd tərəfindən verilib. Təklif olunur ki, İslam investisiya şirkəti "Azərbaycan investisiya şirkəti" SC-nin iştirakı ilə yaradılsın. İlkin nizamnamə kapitalı 90 mln. dollar həcmində müəyyənləşdiriləcək.