Azərbaycan, Bakı / Trend , müxbir S.Babayeva/ Azərbaycan regionlarından olan arıçılar arıçılıq məhsullarının ümumrespublika sərgi-yarmarkasında iştirak etmək məqsədilə beşinci dəfə Bakıya toplaşacaqlar. Azərbaycan Kənd Təsərrüfatı Nazirliyinin Hevyandarlıq məhsullarının istehsalı, emalı, damazlıq işi və otlaqlar şöbəsinin müdiri Çingiz Fərəcovun şənbə günü verdiyi məlumata görə, yarmarka sentyabrın 26-30-da Əl Oyunları Sarayının həyətində keçiriləcək. Sərgi-yarmarkada 40 rayondan 300 arıçı iştirak edəcək. Sərgi-yarmarka zamanı 300 ton balın, 2 kq arı südünün və 10 kq çiçək tozunun satılacağı nəzərdə tutulur.
Fərəcəvun sözlərinrə görə, sərgi çərçivəsində elmi-praktiki konfrans keçiriləcək və konfransda azərbaycanlı və türkiyəli alimlər iştirak edəcək. İştirakçılar tərəfindən arı xəstəlikləri ilə mübarizə, arıların məhsuldarlığının artırılması yolları və bu sahənin digər aktual problemləri müzakirə olunacaq.
Bununla yanaşı, oktyabrın 1-də tədbir iştirakçıları Qubaya yollanacaq və rayonun arıçılıqda əldə etdiyi təcrübə ilə tanış olacaqlar.
"Biz təkcə balı satmağa deyil, həmçinin arıçılıq sahəsini təbliğ etmək və stimullaşdırmaq, bu sahənin özünəməxsusluğunu göstərməyə çalışırıq" - deyə Fərəcov qeyd edib.
Azərbaycanda 105 min arı ailəsi var, onların orta məhsuldarlığı 10- 12 kq təşkil edir. Son altı ay ərzində arı ailələrinin sayı 40 minə qədər artıb.
