Azərbaycan, Bakı, 04 mart / Trend , S.Əliyev/ "BP Azerbaijan" şirkəti Gürcüstanın Zestafoni adlanan ərazisindən təxminən 1 km məsafəyə uzanan Bakı-Supsa neft kəmərində dolanma sahəsinin tikintisini başa çatdırıb. BP-dən verilən məlumata görə, neft kəmərindəki işlər tam qurtarmayıb.
"Şirkət boru kəmərinin neftin ötürülməsi üçün hazırlığına əmin olduqda, onu istifadəyə verəcək"-deyə BP-dən məlumat verilib.
BP Azərbaycan Beynəlxalq Əməliyyatlar Şirkətinin, eyni zamanda, Bakı-Supsa neft kəmərinin operatorudur. Kəmərlə neftin ötürülməsi 2006-cı ilin okyabrında dayandırılmışdı.
ABƏŞ Zestafoni ərazisindəki boru kəməri sahəsində torpaq qatının hərəkət etməsi üzrə monitorinq keçirib. Cüzi hərəkətlər qeydə alınıb ki, bu da boru kəmərinin təxminən 6 mln. dollar dəyərində dolanma sahəsinin tikintisini zəruri edib.
Gürcüstan ərazisində Bakı-Supsa neft kəmərində dolanma sahəsinin tikintisini Almaniyanın MLG şirkəti icra edib.
Bakı-Supsada işlər dayandırılmazdan əvvəl boru kəmərindən ABƏŞ-in "Azəri-Çıraq-Günəşli" yatağından əldə edilən yüngül neft ötürülürdü.
Müəlliflə əlaqə ünvanı: [email protected]