Azərbaycan, Bakı, 20 may / Trend / Azərbaycan Dövlət Neft Şirkəti "Neft Daşları-1887" platformasında eyni adlı yataqda yerləşən yeni quyunun qazma işlərini tamamlamaq üzrədir. Bu haqda ARDNŞ-dan çərşənbə axşamı verilən məlumatda bildirilib.
Quyunun layihə dərinliyi - 2870 metr təşkil edir, cəmi - 2815 metr qazma işləri aparılıb. "Bail limanı" Dəniz Qazma İşləri İdarəsi tərəfindən aparılan qazma işlərinin may ayının sonlarınadək tamamlanacağı planlaşdırılır. İlkin ehtimallara görə, quyunun gündəlik debiti 24 saat ərzində 60 ton neft təşkil edəcək.
Platforma "Neft Daşları" yatağının şimal-şərqi cinahında beşinci texniki blokda quraşdırılıb. O, 2006-cı ilin noyabrında istismara verilib.
Geoloqların qənaətinə görə, platformanın quraşdırıldığı sahədə hasil olunacaq neft ehtiyatları 8 mln. tona bərabərdir. Platformada 32 maili quyunun qazılması nəzərdə tutulub.
