Azərbaycan, Bakı, 13 aprel / Trend , müxbir E.İsmayılov /
Rusiyanın "Transneft" şirkəti hesab edir ki, Novorossiysk limanından boşaldılan neftin keyfiyyət bankının tətbiqi sistemi neftin növündən asılı olaraq üç aydan səkkiz aya qədər vaxt apara bilər. Bu barədə bazar ertəsi Trend -a Moskvadan telefonla "Transneft"-dəki mənbə, Rusiya KİV-in Rusiya Enerji Nazirliyinin "Transneft" sistemi ilə nəql olunan və Novorossiysk, Tuapse və Primorsk limanlarında boşaldılan neft üçün keyfiyyət bankının yaradılmasının məqsədəuyğun olması ilə bağlı rəy bildirməsi haqda yaydığı məlumatı şərh edərkən deyib.
"Biz, icraçılar olaraq bu layihəni bir neçə həftə ərzində tətbiq etməyə hazırıq, amma bizim müxtəlif - altı aydan səkkiz aya qədər vaxt variantlarımız var. Amma bunun üçün hələ mövcud olmayan qərarın qəbulu lazımdır", - mənbə deyib.
Onun fikrincə, Novorossiysk limanındakı neftə keyfiyyət bankı tətbiqi üçün xammalın saxlanılması üzrə əlavə rezervuarların tikintisinə ehtiyac duyulmayacaq.
"Bizim hər rezervuar parkımızda ayrı tutumlu qablar var. Biz müxtəlif qabları müxtəlif neft növləri üçün sərf edə bilərik. Bu problem deyil", - mənbə deyib.
Keyfiyyət bankının yaradılması, həmçinin xammalın keyfiyyətindən asılı olaraq müxtəlif istehsalçıların neftlərinin hesablama əmsalının tətbiqini nəzərdə tutur.
Azərbaycan nefti Novorossiysk limanına Bakı-Novorossiysk neft kəməri ilə çatır. Bu neft başqa neftlərlə qarışaraq URALS qismində satılır.
"Texniki tərəfdən problemin iqtisadi xarakteri də var. Keyfiyyət bankının tətbiqi yeni hasilatın təşkili deməkdir. Vergilər Nazirliyində hesab edirlər ki, biz nefti qarışdırsaq, bu, artıq yeni məhsul olacaq və ona 18 faizlik ƏDV tətbiq etməyi təklif edirlər", - mənbə bildirib.
Onun sözlərinə görə, nefti Rusiyanın aldığı təmiz formada satmaq təklifi var.
"Belə təkliflər də var. Azərbaycan və Xəzər neftini başqalarından ayırmaq olar. Ancaq burada söhbət ölkədaxili (Rusiya) münasibətlərdən gedir. Azərbaycan nefti keyfiyyətlidir. Buradakı problem Tatarıstan və Başqırdıstanda istehsal edilən (və Novorossiyskə tədarük edilən) neftdədir. Onların tərkibində kükürdün səviyyəsi yüksəkdir", - mənbə qeyd edib.
SOCAR birinci rübdə Bakı-Novorossiysk boru kəməri ilə təxminən 610 min ton neft ixrac edib. Bir il əvvəl analoji dövrdə bu rəqəm 249 min tona bərabər olub. Martda bu kəmərlə 224 min tondan çox neft ixrac olunub.
2008-ci ildə Bakı-Novorossiysk kəməri ilə 1,2 milyon ton Azərbaycan nefti nəql olunub. 2007-ci ildə də ixrac bu rəqəmə bərabər olub.
Məqalə müəllifi ilə əlaqə ünvanı: [email protected]