Azərbaycan, Bakı, 25 fevral / Trend , müxbir E.İsmayılov/
Bu il Türkiyə Xəzərin Azərbaycan sektorundakı "Şahdəniz" qaz-kondensat yatağından 6,6 milyard kubmetr həcmində qaz alacaq. Bu barədə cümə axşamı ARDNŞ-nin yüksəkvəzifəli nümayəndəsi bildirib.
"Bu il Türkiyəyə müqavilədə nəzərdə tutulan həcm - 6,6 milyard kubmetr qaz ixrac ediləcək", - ARDNŞ nümayəndəsi deyib.
Qazın qalan həcmi Azərbaycana və Gürcüstana veriləcək.
Plana görə, bu il "Şahdəniz" yatağından 7,6 milyard kubmetr qaz hasilatı planlaşdırılır. 2009-cu ildə bu həcm 6,2 milyard kubmetr təşkil edib.
Müqaviləyə əsasən, "Şahdəniz" yatağının işlənməsinin ilkin mərhələsində (ehtiyatların ümumi həcmi 1,2 trilyon kubmetr həcmində dəyərləndirilir) Türkiyə hər il 6,6 milyard kubmetr qaz almalıdır.
"Şahdəniz" yatağının işlənməsinə dair müqavilə 1996-cı il iyunun 4-də imzalanıb. Sazişin iştirakçıları: BP (operator) - 25,5 faiz, Statoil - 25,5 faiz, NICO - 10 faiz, Total - 10 faiz, LukAgip - 10 faiz, TPAO - 9 faiz, ARDNŞ - 10 faiz.
