Azərbaycan, Bakı, 26 fevral / Trend , müxbir E.İsmayılov/
"Azərenerji" SC (Azərbaycanda elektrik enerjisi istehsalçısı və paylayıcısı) smart-sayğacların quraşdırılmasına və köhnə elektrik sayğaclarının yeni smart-kart əsasında işləyən sayğaclarla əvəz edilməsinə dair işləri genişləndirir. Bu barədə SC-nin prezidenti Etibar Pirverdiyev cümə günü deyib.
"SC hazırda ölkənin 12 rayon mərkəzində sayğac quraşdırılması üzrə iş aparır. Həmçinin bu il Sumqayıt şəhərində də sayğac quraşdırılmasına başlanılması planlaşdırılır", - Pirverdiyev deyib.
Onun sözlərinə görə, bu prosesin bu il ərzində başa çatdırılması nəzərdə tutulur. Sayğacların istifadəsi elektrik enerjisinin istehlakına görə ödəmələrlə bağlı olan problemin 95-98 faiz həll edilməsinə imkan verir.
"Bu sayğaclar ilkin olaraq Gəncə şəhərində quraşdırılıb. Həmin şəhərin təxminən 75 min abunəçisi sayğacla tamamilə təmin olunub. Gəncəni nümunə göstərərək demək olar ki, həmin sayğaclardan istifadə elektrik enerjisinin 25-30 faiz qənaətinə gətirib çıxarır. Bundan əlavə tədarük edilmiş elektrik enerjisinə görə yığımlar 100 faizə çatıb", - Pirverdiyev deyib.
