Azərbaycan, Bakı, 27 aprel /Trend, müxbir E.İsmayılov/
Azərbaycan, Gürcüstan və Rumıniya arasında daha əvvəl imzalanan qaz sahəsində qarşılıqlı anlaşma haqqında memorandumu möhkəmləndirmək üçün daha yüksək strateji sənəd imzalana bilər. Bunu Azərbaycanın sənaye və energetika naziri Natiq Əliyev deyib.
"Azerbaijan-Georgia-Romania Interconnector" layihəsi çərçivəsində "Maye qaz və onun nəqli sahəsində əməkdaşlıq haqqında" memorandum aprelin 13-də Azərbaycanın sənaye və energetika naziri Natiq Əliyev, Rumıniyanın iqtisadiyyat, ticarət və biznes mühiti naziri Adrian Videanu və Gürcüstanın energetika naziri Aleksandr Xetaquri arasında imzalanıb.
"Hesab edirəm ki, bu gün əvvəl imzalanmış memorandumu daha da möhkəmləndirmək, dövlət və dövlət başçılarının iradəsini ifadə etmək üçün Rumıniya, Azərbaycan və Gürcüstan arasında daha yüksək strateji sənədə ehtiyac duyula bilər", - Əliyev deyib.
Əliyev imzalanan memorandum əsasında Azərbaycan, Rumıniya və Gürcüstan tərəflərinin maye qazın Rumıniyaya nəqlini nəzərdən keçirməyi qərara aldığını hesab edərək bu sənədi müsbət qiymətləndirır.
Azərbaycanın maye qazının Rumıniyaya nəqli layihəsi maye qaz üçün iki terminalın tikintisini nəzərdə tutur. Onlardan birinin Gürcüstanda, digərinin isə Rumıniyada tikilməsi nəzərdə tutulur. İlkin məlumatlara görə, layihənin dəyəri 4-6 milyard dollar təşkil edəcək.
Layihə Azərbaycan qazının Gürcüstanın Qara dəniz sahillərində qaz kəmərləri vasitəsilə nəqlini və orada xüsusi terminalda mayeləşdirilməsi və bundan sonra tankerlərlə Rumıniyanın Konstansa limanındakı terminala çatdırılmasını nəzərdə tutur. Sonra maye qaz təbii qaz halına salınacaq və ölkə ərazisində mövcud olan qaz infrastrukturlarından istifadə etməklə, Rumıniya və digər Avropa ölkələrinin tələbatının təmin edilməsinə yönəldiləcək.
Memoranduma əsasən, tərəflər "Cənub dəhlizi" çərçivəsində Xəzər regionu və Avropanı birləşdirən energetika tranziti dəhlizinin inkişafına dair niyyətlərini bildiriblər, qaz ticarəti və Rumıniyanın yeraltı qazsaxlama anbarlarından istifadə, həmçinin energetika sahəsində fəaliyyət göstərən müvafiq strukturlar arasındakı əməkdaşlığın genişləndirilməsi imkanlarının araşdırılmasına dair qərar qəbul edilib. "Azerbaijan-Georgia-Romania Interconnector" layihəsinin texniki-iqtisadi əsaslandırılmasının hazırlanması və texniki, texnoloji, maliyyə və hüquqi aspektlərinin müəyyən edilməsi məqsədilə Buxarestdə şirkət yaratmağa dair Rumıniya tərəfindən qərar qəbul edilib.
