Azərbaycan, Bakı, 3 may /Trend, müxbir E.İsmayılov/
Hazırda ARDNŞ (Azərbaycan Respublikası Dövlət Neft Şirkəti) Gürcüstana sutkada bir milyon kubmetr qaz ixrac edir. Bu barədə bazar ertəsi neft-qaz sahəsindəki mənbə məlumat verib.
"Gürcüstana qaz ixracı davam edir. Hazırda bu istiqamətdə bir milyon kubmetrə yaxın qaz ixrac edilir", - mənbə deyib.
ARDNŞ Qazax rayonunda iki ölkəni birləşdirən boru kəməri ilə Gürcüstan bazarında fəaliyyəti çərçivəsində öz qazının bu ölkəyə satışını həyata keçirir. Bu kəmərlə qaz nəqlinin həcmi ildə üç milyard kubmetrə yaxın təşkil edir.
2008-ci ilin noyabr ayında Azərbaycan və Gürcüstan arasında ARDNŞ-nin 2009-cu ildən başlayaraq növbəti 5 il ərzində Gürcüstan bazarında fəaliyyətini aktivləşdirmək imkanı yaradan saziş imzalanıb. Memaronduma əsasən, ARDNŞ layihənin həyata keçirilməsi üçün SOCAR Georgia Gas törəmə müəssisəni yaradıb.
Həmçinin 2008-cil il dekabrın 26-da ARDNŞ və Gürcüstan hökuməti 30 qazpaylayıcı təsərrüfat və qazpaylayıcı şəbəkənin istifadəyə verilməsi barədə müqavilə imzalayıb. Bu şəbəkələr Gürcüstanın Kaxeti, Msxeta-Mtianeti, Şido və Kvemo-Kartli, Acarıstan, Quriya, İmeretiya, Sameqrelo kimi regionlarını əhatə edir. Bu şəbəkələr 24 şirkət tərəfindən istismar edilib.
Mənbənin sözlərinə görə, ARDNŞ Rusiya istiqamətində də ixrac əməliyyatlarını həyata keçirir. Hazırda Rusiya istiqamətində qaz ixracı sutkada üç milyard kubmetr həcmində həyata keçirilir. Bu göstərici müqavilədə bu il üçün nəzərdə tutulan bir milyard kubmetrlik həcmə uyğundur.
Azərbaycan qazının Rusiyaya alqı-satqısı üzrə ortamüddətli müqavilə oktyabrın 14-də Bakıda imzalanıb. 2010-2014-cü illəri əhatə edən müqavilə ARDNŞ (Azərbaycan Respublikası Dövlət Neft Şirkəti) ilə "Qazprom" şirkəti arasında imzalanıb. Müqaviləyə uyğun olaraq, Azərbaycan tərəfi hər il Rusiyaya 500 milyon kubmetrdən az olmayaraq qaz tədarük edəcək. Müqavilədə tədarük həcminin həddi göstərilməyib. ARDNŞ tədarük edə biləcəyi həcm barədə yarım il əvvəldən qarşı tərəfi xəbərdar edəcək.
Azərbaycan qazının Rusiyaya nəqli 2010-cu ilin yanvarından başlanılıb. Bu il Rusiyaya bir milyard kubmetr Azərbaycan qazı ixrac olunacaq. Həmçinin, ARDNŞ və "Qazprom" 2011-ci ildə Rusiyaya nəql ediləcək qazın həcmi barədə razılığa gəliblər. Növbəti ildə bu göstərici təxminən iki milyard kubmetr təşkil etməlidir.
