Azərbaycan, Bakı, 1 iyun / Trend , müxbir S.Əliyev/
2011-ci ilin fevralında ARDNŞ Türkiyənin "Petkim" neft-kimya kompleksinin 51 faizlik payının alınması üçün əldə olunan kreditin ödənilməsini başa çatdıracaq. Bu barədə şirkətin maliyyə məsələləri üzrə vitse-prezidenti Süleyman Qasımov çərşənbə axşamı bildirib.
2008-ci ildə ARDNŞ və "Turcas Petrol/Injaz Projects" tenderdə qalib gəliblər və 2,04 milyard dollar ödəməklə, "Petkim" kimya konserninin səhmlərinin 51 faizinə sahib olublar.
Qasımovun sözlərinə görə, "Petkim"də payın alınması üzrə əldə olunan kreditin həcmi 610 milyon dollardır.
"Bu günədək məbləğin üçdəiki hnissəsi ödənilib. Yerdə qalan 203 milyon dollar 2011-ci ilin fevralında qaytarılacaq", - o deyib.
"Petkim Petrokimya Holding" plastik qablaşdırmalar, parça, yuyucu vasitələr istehsal edir və Türkiyənin bu növdə məhsul istehsal edən yeganə şirkətidir, istehsal etdiyi məhsulun dörddəbir hissəsini isə ixrac edir. "Petkim"in plastik qabların istehsalı üzrə ümumi gücü 1,2 milyon ton təşkil edir.