Azərbaycan, Bakı, 12 oktyabr /Trend, müxbir A.Yusifzadə/
İranda nəqliyyat vasitələri üçün maye qazın sutkada 45 litrlik kvotası müəyyən edilib. Bu barədə Neft məhsullarının paylanması üzrə İran Milli Şirkətinin baş direktoru Fərid Əmiri bildirib. Məlumatı çərşənbə axşamı MEHR agentliyi yayıb.
Onun sözlərinə görə, maye qazın haqqının ödənilməsi bütün yanacaqdoldurma stansiyalarında smart-kartlar vasitəsilə həyata keçiriləcək.
"İndiyədək İranda maye qazın satışı üzrə heç bir məhdudiyyət olmayıb. Lakin hazırkı vəziyyətdə nəqliyyat vasitələri üçün qaz kvotalar üzrə satılacaq", - Əmiri deyib.
İran hökumətinin proqnozlarına görə, kvotaların tətbiqi ölkədə sayı 17 min ədəd olan qazla işləyən nəqliyyat vasitələrini yanacaqla tam təmin etməyə imkan verir.
Haızrda bir litr maye qazın dəyəri təxminən 0,045 dollara bərabərdir.
Bundan əvvəl İranın neft naziri xəbər vermişdi ki, bir kubmetr maye qaz vergi hesablanmadan dövlətə 0,45 dollara başa gəlir, əhaliyə isə 0,045 dollara satılır.
Neft məhsullarının paylanması üzrə Milli Şirkətin məlumatına əsasən, kvotalar tətbiq olunanadək ölkədə nəqliyyat vasitələrinin maye qaza olan tələbatı sutkada 12 milyon litr təşkil edirdi.