Azərbaycan, Bakı, 7 yanvar /Trend ,müxbir E.İsmayılov/
Azərbaycan-Britaniyanın SOCAR-Cape birgə müəssisəsi "Chirag oil project" ("Azəri -Çıraq- Günəşli" yataqlar blokunda neft hasilatının genişlənməsi) çərçivəsində yuxarı platformanın tikintisinin hazırlanması üçün xidmətlərin göstərilməsi üzrə Amec-Tekfen-Azfen ittifaqı ilə müqavilə imzalayıb. Bu barədə Cape-in rəsmi saytında verilən məlumatda deyilir.
ARDNŞ və Cape arasında birgə müəssisənin yaradılması haqqında saziş 2010-cu il 30 iyunda imzalanıb. Birgə müəssisədə iştirak payı bu şəkildə paylanıb: ARDNŞ - 51 faiz, Cape - 49 faiz.
"Chirag oil project" artıq işləyən "Çıraq" və "Günəşli" platformaları arasında dənizin 170 metr dərinliyində quraşdırılacaq "Qərbi Çıraq" adlı yeni platformanın inşasını nəzərdə tutur.
"Chirag oil project" altı milyard dollar həcmində investisiyanı nəzərdə tutur.
AÇG-də neft hasilatının genişlənməsi çərçivəsində inşa olunacaq yeni platformadan Azeri Light neftinin planlaşdırılmış sutkalıq hasilat həcmi 183 min barel təşkil edəcək. Yeni platformadan qaz hasilatının gözlənilən sutkalıq həcmi 6,5 milyon kubmetri keçəcək. Platformada təbəqəyə doldurulan qazın gözlənilən sutkalıq həcmi 2,3 milyon kubmetrə yaxın olacaq.
Layihə çərçivəsində qazma 2010-cu ilin ikinci yarısı - 2012-ci ilin birinci yarısını əhatə edəcək. Qazma işləri "Dədə Qorqud" qurğusu vasitəsilə həyata keçiriləcək platformadan hasilatın başlanması 2013-cü ilin sonuna planlaşdırılıb.
Layihənin gerçəkləşməsi çərçivəsində cəmi 300 milyon barel neftin hasilatı planlaşdırılır.
"Azəri-Çıraq-Günəşli" yatağının işlənməsi üzrə layihənin iştirakçıları -BP (operator - iştirak payının 37,43 faizi), Chevron (11,27 faiz), ARDNŞ (10 faiz), INPEX (10,96 faiz), Statoil (8,56 faiz), Exxon (8 faiz), TPAO (6,75 faiz), Itochu (4,3 faiz), Hess (2,72 faiz).