Azərbaycan, Bakı, 2 mart /Trend, müxbir E.İsmayılov/
Ötən il Xəzərin Azərbaycan sektorundakı "Azəri-Çıraq-Günəşli" (AÇG) yataqlar blokunun operatoru olduğu Böyük Britaniyanın ВР şirkəti ARDNŞ-yə (Azərbaycan Respublikası Dövlət Neft Şirkəti) 3,4 milyard kubmetr səmt qazı verib. Bu barədə BP şirkətinin çərşənbə günü yaydığı rəsmi hesabatda deyilir.
Səmt qazı AÇG-nin işlənməsi çərçivəsində ARDNŞ-yə pulsuz verilir.
Hesabatda deyildiyi kimi, ötən il AÇG-dən ARDNŞ-yə cəmi 1,9 milyard kubmetr səmt qazının verilməsi planlaşdırılmışdı.
Hesabat dövründə ARDNŞ-yə verilən qazın orta sutkalıq həcmi 9,4 milyard kubmetr təşkil edib.
2009-cu ildə ARDNŞ-yə planlaşdırılan 1,45 milyard kubmetrə nisbətdə 4 milyard kubmetrə yaxın qaz verilib.
"Azəri-Çıraq-Günəşli" yataqlar blokunun səhmdarları bunlardır: BP (operator - 34,1%), "Chevron" (10,2%), ARDNŞ (10%), INPEX (10%), "StatoilHydro" (8,6%), "ExxonMobil" (8%), TRAO (6,8%), "Devon" (5,6%), ITOCHU (3,9%), "Hess" (2,7%).
