Azərbaycan, Bakı, 9 iyun /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) sentyabr ayınadək şirkətin 2025-ci ilə qədər kompleks strateji inkişaf planının hazırlanması çərçivəsində işləri başa çatdırmaq fikrindədir. Trend-in məlumatına görə, bu barədə cümə axşamı ARDNŞ-nin yüksək vəzifəli nümayəndəsi bildirib.
"Sənədin əsası artıq hazırdır [...] Hesab edirəm ki, sentyabradək onun üzərində işlər tam başa çatacaq", - ARDNŞ nümayəndəsi deyib.
Onun sözlərinə görə, yeni planın hazırlanması üçün xüsusi komissiya yaradılıb, oraya ARDNŞ-nin müxtəlif bölmə və müəssisələrinin nümayəndələri daxil olublar. Habelə, müəyyən analitik işlərin görülməsi üçün məsləhətçi şirkət - "PricewaterhouseCoopers" seçilib.
Sənədlər üzərində işlər ötən ilin avqustundan başlayıb və xeyli vaxt aparıb, çünki ARDNŞ öz balansında çoxlu sayda müəssisələrə, 80 minə yaxın əməkdaşa malikdir. O cümlədən son ilyarım ərzində şirkətin tərkibinə "Azəriqaz" (qazın paylanması) və "Azərikimya" (kimyəvi məhsulların istehsalı) kimi iri aktivlər daxil edilib.
ARDNŞ nümayəndəsi qeyd edib ki, şirkət beynəlxalq neft-qaz şirkətlərinin səviyyəsinə uyğun gələn keyfiyyət planı hazırlamaq fikrindədir ki, bu da mövcud imkanların yenidən dəyərləndirilməsini, şirkətin gələcək məqsədlərinin və yeni istiqamətlərinin qiymətləndirilməsini tələb edir.
ARDNŞ nümayəndəsinin sözlərinə görə, inkişaf planı çərçivəsində nəzərdə tutulan iri layihələrdən biri regionda iri neft və qaz emalı, neft-kimya müəssisəsinin yaradılması olacaq.
