Azərbaycan, Bakı, 6 oktyabr /Trend, müxbir E.İsmayılov/
"Ekol Mühəndislik Xidmətləri" QSC-nin Ekoloji Monitorinq Departamenti (EMD) QSC-nin fəaliyyət sahələrində mütəmadi ekoloji monitorinq və kompleks analitik tədqiqatlar aparmaqla yanaşı, müqavilə əsasında bir çox "Sifarişçi" müəssisə və təşkilatlara da xidmət göstərir.
Hazırda EMD müqavilə əsasında 15-ə qədər "Sifarişçi" müəssisə və təşkilatlara ekoloji monitorinq, kompleks laboratoriya, ekoloji normativ-texniki sənədlərin işlənib hazırlanması, ətraf mühitə təsirin qiymətləndirilməsi və s. ekoloji yönümlü xidmətlər göstərir.
EMD-nin xidmət göstərdiyi təşkilatlardan biri də "Bahar Energy Operating Limited" şirkətidir. QSC bu şirkətlə üç istiqamətdə - ilkin ekoloji vəziyyətin qiymətləndirilməsi, ətraf mühitə təsirin qiymətləndirilməsi və ekoloji normativ-texniki sənədlərin işlənib hazırlanması xidmətlərinin göstərilməsi sahəsində müqavilə imzalayıb.
Müqavilənin icrasını təmin etmək məqsədilə oktyabrın 4-dən başlayaraq EMD-nin 9 nəfərdən ibarət ekspedisiya qrupu "Qum-dəniz" və "Bahar" yataqlarında ("Bahar-1", "Bahar-2") tədqiqat işləri aparacaq. Ekspedisiya lazımi cihaz və avadanlıqlarla təchiz olunmuş MPK-452 xüsusi gəmisi ilə həyata keçiriləcək və meteoroloji şəraitdən asılı olaraq 7 gün davam edəcək. Bu barədə QSC-nin cümə axşamı yaydığı məlumatda deyilir.
İlkin ekoloji vəziyyətin qiymətləndirilməsi məqsədini daşıyan ekspedisiya müddətində, Xəzərin dənizinin "Qum-dəniz" və "Bahar" ("Bahar-1", "Bahar-2") yataqları ərazisindəki müxtəlif horizontlarından su və dib çöküntülərinin nümunələri götürülərək kimyəvi analizlər ediləcək. Eyni zamanda, su və dib çöküntülərindəki mikroorqanizmlər öyrəniləcək və ekspress tədqiqat işləri (suyun axın sürəti, temperaturu və s. təyini) aparılacaq.
