Azərbaycan, Bakı, 2 dekabr /Trend/
Azərbaycan, onun bu günü və sabahı ilə bağlı geniş süjetlər hazırlayan Belarus televiziyasının çəkiliş qrupu dekabrın 1-də Sumqayıtda olub. Gənclik şəhərinə olan maraq həm də Belarusun iri sənaye mərkəzlərindən olan, Dnepr üzərində yerləşən Mogilyov şəhəri ilə Xəzər qoynundakı Sumqayıtın dostluq və qardaşlıq əlaqələrinin son zamanlar daha da genişlənməsindən irəli gəlir.
ARDNŞ-nin "Azərikimya" İB-dən cümə günü Trend-ə verilən məlumata görə, Azərbaycan və Belarus nümayəndə heyətlərinin bu il növbəti qarşılıqlı səfərləri zamanı iki ölkə və bu iki qardaşlaşmış şəhər arasında iqtisadi və mədəni əlaqələrin daha da möhkəmləndirilməsi ilə bağlı görüşlər keçirilib, ikitərəfli əlaqələrin daha səmərəli, qarşılıqlı faydalı olaraq qurulması üçün geniş fikir mübadiləsi aparılıb, maraqlı təkliflər irəli sürülüb. Əhalisinin sayına və neft-kimya sənayesinin şəhərin iqtisadiyyatındakı xüsusi çəkisinə görə Sumqayıtla təxminən eyni olan Mogilyovla və bütünlükdə Belarusla iqtisadi əlaqələrin, inteqrasiya proseslərinin gücləndirilməsi son illərdə hər iki tərəf üçün xüsusilə faydalı olub.
Belarusun Mərkəzi televiziyasının çəkiliş qrupuna İB rəhbərliyinin verdiyi müsahibədə bu məqamlardan, Azərbaycanla Belarus arasındakı münasibətlərin son illər daha da möhkəmlənməsindən söz açılıb, respublikamızın neft-kimya sənayesi üçün bir çox mühüm avadanlığın və xammalın Belarusdan alındığı barədə məlumat verilib, ikitərəfli əlaqələrin daha da genişləndirilməsi üçün böyük potensialın olduğu bildirilib. Birlik rəhbərliyi "Azərikimya"nın dünəni və bu günü, həm də perspektivi - yeni və daha müasir neft-kimya kompleksinin, kiçik və orta biznesin inkişafında mühüm rol oynayacaq Sumqayıt sənaye şəhərciyinin yaradılacağı haqqında geniş məlumat verib, neft və qaz emalı, həmçinin neft-kimya sahəsində Belarus həmkarlarının Avropaya inteqrasiya etmə təcrübəsinin, neft-kimya sahəsini daha da inkişaf etdirmək üçün zəngin elmi-texniki bazasının Azərbaycan üçün də faydalı ola biləcəyini, birgə müəssisələrin yaradılmasının mümkünlüyünü və vacibliyini diqqətə çatdırıb.
Müsahibə zamanı Belarus teleəməkdaşlarının suallarına cavab olaraq Sumqayıtda yaxın zamanlarda idmanın, həmçinin futbolun inkişafı istiqamətində görülən tədbirlərdən, o cümlədən şəhərdə 15 min tamaşaçı yerinə malik olacaq yeni stadionun inşa ediləcəyi, Mogilyovla Sumqayıt arasında iqtisadi əlaqələrlə yanaşı, sosial-mədəni əlaqələrin də inkişaf etdirilməsinin vacibliyi barədə söhbət açılıb.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
