McDermott şirkətinin Azərbaycandakı nümayəndəliyində həmkarlar ittifaqları komitəsi yaradılıb. Neft və qaz sənayesi işçilərinin həmkarlar ittifaqları Respublika komitəsindən Trend ə verilən məlumata görə, bu məqsədlə dekabrın 24-də Azərbaycanın Həmkarlar İttifaqları Konfederasiyasında hüquq-mühafizə təşkilatları və McDermott şirkətinin nümayəndələrinin iştirakı ilə təsis konfransı keçirilib.
Konfransda Azərbaycan Həmkarlar İttifaqları Konfederasiyasının rəhbəri Səttar Mehbalıyev, NQSİHİRK-nın rəhbəri Cahangir Əliyev, neftçilərin hüquqlarının müdafiəsi komitəsinin sədri Mirvari Qəhrəmanlı, McDermott-un baş meneceri Derek Parson, Azərbaycan Dövlət Neft Şirkətinin nümayəndəsi Rəşid Hüseynov və başqaları iştirak edib.
Komitənin rəhbər orqanları seçilib və nəzarət-təftiş komissiyasının 3 nəfərdən ibarət tərkibi təsdiqlənib.
Açıq səsvermə yolu ilə Tofiq Qorçiyev komitənin rəhbəri təyin edilib və nizamnaməyə əsasən, komitənin 19 üzvündən 5-i rəyasət heyətinin tərkibinə daxil olub.
Analoji tədbir dekabrın 19-da Bosshelf-də də keçirilib.