Bakı-Tbilisi-Ceyhan ixrac boru kəmərinin ötürmə qabiliyyətinin genişləndirilməsi $1 mlrd. dəyərində qiymətləndirilir. Trend in xəbər verdiyi kimi, bu barədə bu gün sənaye və energetika naziri Natiq Əliyev bildirib.
Onun sözlərinə görə, kəmərin hazırki keçirmə qabiliyyəti həcmindən artıq neft nəql etmək istəyən tərəflər nəqlin həcmi ilə bağlı zəmanət verməlidirlər ki, səhmdarlar boru kəmərinin genişləndirilməsinə başlasınlar.
Kimyəvi reaktivlərdən istifadə olunmaqla boru kəmərinin ötürmə qabiliyyəti (sutkada 1 mln barrel neft) 300-400 min barrel artırıla bilər. "Nasos stansiyalarında müvafiq işlər görməklə, ötürmə gücü daha 400 min barrel artırıla bilər", - deyə o bildirib.
BTC vasitəsilə Qazaxıstan neftinin nəqlinə dair tranzit sazişinin bağlanması məsələsinə toxunan N. Əliyev qeyd edib ki, bu təşəbbüs sponsor şirkətlər qrupu - layihədə iştirak edən və Qazaxıstanda işləyən "Total", "Inpex", "Eni" və "ConocoPhilips" şirkətləri tərəfindən yürüdülməlidir. Bu qrupa Fransanın "Total" şirkəti rəhbərlik edir.
"Bu şirkətlər Qazaxıstandan Azərbaycana neft nəqlinin imkanlarına dair normativ-hüquqi bazanı öyrənməlidirlər", - deyə nazir bildirib.
