BP Azerbaijan bu gün Azərbaycanda Cənubi Qafqaz qaz kəməri və Bakı-Tbilisi-Ceyhan (BTC) boru kəməri layihələri üzrə əhaliyə sərmayə qoyma proqramlarının (CİP) həyata keçirilməsi ilə tanış edib.
Trend xəbər verir ki, 3 il müddətinə nəzərdə tutulmuş CİP 2003-cü ildə başlanıb və layihələrin həyata keçirilməsi üzrə QHT-lərin müxtəlif tərəfdaş şirkətləri ilə birgə icra edilib.
BP-Azerbaijan şirkətinin ictimaiyyətlə əlaqələr və ictimai sərmayələr üzrə meneceri Ariana Əliyevanın sözlərinə görə, 3 il ərzində 8,26 mln. ABŞ dolları həcmində sərmayə qoyulub.
Bu vaxt ərzində 8 layihə gerçəkləşdirilib: Əhalinin səfərbərliyi və potensialın artırılması ($3.012 mln.), Yerli QHT-lərin potensialının artırılması üzrə proqram ($559,58 min), Səhiyyə sahəsində layihələr ($1.536 mln.), mikromaliyyələşdirmə üzrə təşəbbüs ($1,356 mln.), "Nümayəndələri layihələrin həyata keçirilməsi təcrübəsinə malik olan yaşayış məntəqələri və yeni yaşayış məntəqələri" proqramı ($624,192 min), xəbərdar olmanın artırılması və ətraf mühitin vəziyyətinin yaxşılaşdırılması proqramı ($566,896 min), suyun təmizlənməsi proqramı ($251,16 min), məktəblərlə əlaqənin yaxşılaşdırılması və Azərbaycanın dünya ictimaiyyətinə inteqrasiyası proqramı ($71,3 min).
CİP-in həyata keçirildiyi vaxt ərzində layihələr Azərbaycanın cəmi 117 yaşayış məntəqəsində həyata keçirilib.