Bakı. Trend
COP prosesində bütün əsas qərarlar yekdilliklə qəbul edilməlidir.
Trend xəbər verir ki, bunu Azərbaycan energetika nazirinin müavini, bu ilin noyabr ayında Bakıda keçiriləcək BMT-nin İqlim Dəyişmələri üzrə Çərçivə Konvensiyasının (UNFCCC) Tərəflər Konfransının 29-cu sessiyasının (COP29) baş katibi Elnur Soltanov Türkiyənin “Anadolu” agentliyinə müsahibəsində deyib.
O bildirib ki, bununla belə, yekdillik tələb etməyən, lakin bizi iqlim sahəsində irəli aparacaq təkliflər də müzakirə olunacaq.
"Azərbaycan da bu məsələ ilə bağlı 14 təklif irəli sürüb. Bu təklifləri həyata keçirmək üçün yekdilliklə bəzi ölkələr və ya şirkətlərlə müzakirə edəcəyik. Azərbaycanın təklifi ilə müzakirə ediləcək məsələlər arasında iqlim maliyyəsi, enerji, kənd təsərrüfatı, su ehtiyatları, turizm, rəqəmsallaşma, yaşıl şəhərlər və insan resursları da var. Olimpiadada olduğu kimi, bütün dünyada atəşkəsə çağıracağıq”, - o qeyd edib.
E.Soltanov ümumilikdə COP29-da Azərbaycanın təxminən 80 min qonağı qəbul edəcəyini, müxtəlif günlərdə Azərbaycana müxtəlif sayda qonaqların gəlib-gedəcəyini bildirib:
"Bizim bir gündə təxminən 40 min qonağı qəbul etmək üçün infrastrukturumuz var. Dünyanın bütün dövlət başçılarına dəvətlər göndərilib. 50-dən çox dövlət və hökumət başçısı iştirak edəcəklərini təsdiqləyib. Bu sayın artacağını gözləyirik. Ermənistan da dəvət olunub.
COP29 Azərbaycanın bu günə qədər ev sahibliyi etdiyi heç bir beynəlxalq tədbirlə müqayisə olunmayacaq bir tədbir olacaq. Biz iqlim danışıqlarına rəhbərlik edəcəyik və ölkə olaraq bu məsələ ilə bağlı fəaliyyətimizi nümayiş etdirəcəyik. Biz Azərbaycanın qonaqpərvərliyini göstərəcəyik. Biz dövlət qurumlarının, şirkətlərin və qeyri-hökumət təşkilatlarının koordinasiyalı fəaliyyəti ilə keyfiyyətli təşkilatçılıq həyata keçirəcəyik. COP-un uğursuz olma ehtimalı yoxdur".
Xatırladaq ki, BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyası bu ilin noyabrında Azərbaycanda keçiriləcək. Bununla bağlı qərar ötən il dekabrın 11-də Dubayda keçirilən COP28 plenar iclasında qəbul edilib. İki həftə ərzində dünyanın mərkəzinə çevrilən Bakı 70-80 minə yaxın xarici qonaq qəbul edəcək.
Birləşmiş Millətlər Təşkilatının İqlim Dəyişikliyi üzrə Çərçivə Konvensiyası 1992-ci ilin iyununda Rio-de-Janeyroda keçirilən Yer Sammitində insanın iqlim sisteminə təhlükəli müdaxiləsinin qarşısını almaq üçün imzalanmış sazişdir. "COP" (Conference of Parties) abbreviaturası İqlim Dəyişikliyi üzrə Çərçivə Konvensiyasının icrasına nəzarət edən ən yüksək qanunverici orqan olan "Tərəflərin Konfransı" mənasını verir.
Konvensiyada 198 ölkə iştirak edir. Tərəflər başqa cür razılaşmırsa, COP hər il keçirilir. İlk COP tədbiri 1995-ci ilin martında Berlində baş tutdu və onun katibliyi Bonnda yerləşir.