Azərbaycan, Bakı, 20 avqust / Trend , müxbir Q.Vəliyev /
"Bakının 20 məktəbinin Təhsil Nazirliyi ilə Bakı Baş Təhsil İdarəsini birləşdirən optik-lifli şəbəkəyə qoşulması üzrə işlər başa çatdırılıb", - Trend -a TN-dən deyilib.
Qurumun məlumatına görə, layihənin realizəsi təhsil müəssisələrinə yüksək sürətli internet şəbəkəsinə qoşulmaq imkanı verəcək. İşlər 2008-2012-ci illərdə Azərbaycan Respublikası təhsil sisteminin informativləşdirilməsi üzrə dövlət proqramı çərçivəsində həyata keçirilən "Elektron məktəb" pilot layihəsi çərçivəsində realizə edilir. Layihənin realizəsi təhsil sistemində informasiya-kommunikasiya texnologiyalarının tətbiqinin vacibliyini qiymətləndirmək imkanı verəcək.
Layihədə Heydər Əliyev adına litsey, Avropa litseyi, "Ankara" listey-məktəbi, Elit Gimnaziya, "Zəngi" litseyi, Fizika-riyaziyyat təmayüllü litsey, "Tərəqqi" texniki-humanitar litseyi, №220 saylı litsey-məktəb və digər ümumtəhsil müəssisələri iştirak edir.
Hazırda ümumtəhsil portalının yaradılması işlərində birinci mərhələ başa çatdırılıb. Portalın funksiyaları dörd qrup istifadəçilərə çıxış imkanı verəcək: müəllim, şagird, tələbə və valideynlər. Onların hər biri üçün ayrı interfeys müəyyən ediləcək. Portalda həmçinin müxtəlif elektron tədris resursları yerləşdiriləcək.
Dövlət proqramının ikinci komponenti Azərbaycan təhsil şəbəkəsi - AzEduNet-in yaradılmasıdır. Onun əsas məqsədi ölkənin bütün ümumtəhsil müəssisələrinin vahid, yüksək sürətli şəbəkəyə birləşdirilməsidir. Bu gün şəbəkəyə respublikanın 200 məktəbi qoşulub. AzEduNet şəbəkəsi ölkə daxilində ümumtəhsil məktəbləri arasında yüksək sürətli informasiya mübadiləsini təmin etmək, həmçinin kontentə çıxışı asanlaşdırmaq imkanı verəcək.
Məqalə müəllifi ilə əlaqə ünvanı: [email protected]
