Azərbaycan, Bakı, 12 oktyabr /Trend, müxbir H.Vəliyev/
Azərbaycanın mobil rabitə operatoru "Azercell Telekom" MMC öz şəbəkə istifadəçiləri üçün "2 saniyə=1 kontur" və "Köhnə dost yeni dostdan yaxşıdır" adı altında yeni aksiyanın keçirilməsini elan edib. Bu barədə çərşənbə axşamı şirkətdən verilən məlumatda deyilir.
"2 saniyə=1 kontur" kampaniyası həm yeni abunəçilər, həm də öz nömrələrini bərpa edən abunəçilər üçün nəzərdə tutulub. Kampaniya il ərzində ölkə daxilində bütün istiqamətlərdə "2 saniyə=1 kontur" tarifi üzrə danışmağa, həmçinin, MMS/İnternet xidmətinə 50 faizli endirim əldə etməyə imkan verəcək. "2 saniyə=1 kontur" kampaniyası 2011-ci il yanvarın 12-dək qüvvədədir.
"Köhnə dost yeni dostdan yaxşıdır" kampaniyası aktiv olmayan "SİM-kart"lar üçün nəzərdə tutulub ki, o da "3 saniyə=bir kontur" tarifi ilə ölkə daxilində bütün istiqamətlərdə danışmağa, həmçinin, MMS/İnternet xidmətlərinə 50 faizli endirim və ölkədaxili zənglər üçün 25 dəqiqə (500 kontur) qazanmağa imkan verəcək.
"Köhnə dost yeni dostdan yaxşıdır" kampaniyası 2010-cu il oktyabrın 12-dən 2011-ci il yanvarın 12-dək qüvvədədir.
Kampaniya çərçivəsində təqdim olunan bonus və endirimlərin istifadə müddəti 6 aydır.
Çıxış xətti sentyabrın 27-dək bağlı olan "SimSim" abunəçiləri istənilən nominallı "SimSim" danışıq kartını yükləməklə kampaniyada iştirak edə bilərlər. Pulsuz dəqiqələrin istifadə müddəti 7 gündür.