Azərbaycan, Bakı, 16 may /Trend, müxbir H.Vəliyev/
İlin sonuna kimi Azərbaycan Milli Elmlər Akademiyasının (AMEA) doqquz struktur şöbəsi "AzScienceNet" elmi kompyuter şəbəkəsinə qoşulacaq. Bu barədə Trend-ə AMEA-nın İnformasiya Texnologiyaları İnstitutundan (İTİ) bildiriblər.
İTİ-dən bildirilib ki, bu istiqamətdə işlər Azərbaycanda elan edilən "İKT ili" çərçivəsində AMEA-nın fəaliyyət planında nəzərdə tutulub. Plana əsasən, Zoologiya İnstitutu, Kimyəvi Aşqarlar İnstitutu, Botanika və Mikrobiologiya institutları, Neft-Kimya Prosesləri İnstitutu, Azərbaycan Tarixi Muzeyi, Şəki Elmi Regional Mərkəz, Lənkəran Elmi Regional Mərkəzi və AMEA-nın Naxçıvan bölməsi "AzScienceNet" şəbəkəsinə çıxış əldə edəcək:
"İşlər çərçivəsində yeni fiber-optik xətlərin çəkilməsi planlaşdırılır. Bununla yanaşı, AMEA-nın bir sıra institutlarında intellektual kommutator bazasında lokal şəbəkələr genişləndiriləcək, həmçinin şəbəkənin informasiya təhlükəsizliyinin təminatı üzrə işlər gücləndiriləcək".