Azərbaycan, Bakı, 7 mart /Trend, müxbir H.Vəliyev/
2014-cü ilin fevralında Milli Sertifikat Xidmətləri Mərkəzi tərəfindən verilən elektron rəqəmsal imzaların ümumi sayı 1,7 faiz artaraq mart ayının 1-nə olan vəziyyətə görə, 18 285 ədəd təşkil edib. Bu barədə cümə günü Trend-ə Rabitə və İnformasiya Texnologiyaları Nazirliyinin Məlumat Hesablama Mərkəzindən (MHM) deyiblər.
MHM-in məlumatına görə, verilən elektron rəqəmsal imzaların ümumi sayından dövlət strukturlarının payına 12 586 ədəd düşüb, 736 ədəd hüquqi şəxslərə və 4 963 ədəd isə vətəndaşlara verilib.
"Elektron hökumət" portalına müraciətlərin sayında da əhəmiyyətli artım qeydə alınıb.
2013-cü ilin fevralında müraciətlərin sayı 31 655 ədəd olduğu halda, 2014-cü ilin fevralında bu göstərici 301 496 ədəd təşkil edib. 2013-cü ilin dekabrından 2014-cü il martın 1-dək portala müraciətlərin sayı 532 043 ədəd olub. Hesabat dövründə portaldakı elektron xidmətlərdən 897 300 dəfə istifadə olunub.
"Elektron hökumət" portalında (e-gov.az) təsdiq edilmiş elektron xidmətlərin sayı 428 ədəd təşkil edib və portalda 252 elektron xidmətdən istifadə etmək mümkündür. Dövlət strukturlarının saytlarında yerləşdirilən elektron xidmətlərin ümumi sayı isə 456 ədəd təşkil edir.