Madriddə Aeronaviqasiya Məlumat Xidmətlərinin Ümumdünya Koqresi başa çatıb. Tədbirdə Azərbaycan R.I.S.K. elmi-istehsal şirkəti tərəfindən təmsil olunub. Trend şirkətə istinadən xəbər verir ki, konqress iştirakçılarına şirkətin PANDA adlı aeronaviqasiya proqram əlavələri kompleksi təqdim olunub ki, bunun vasitəsilə təyyarə uçuşlarının avtomatlaşdırılmış dizaynı və aeronaviqasiya kartoqrafiyası konsepsiyası nümayiş etdirilib.
Konqres iştirakçıları PANDA sisteminin aeronaviqasiya məlumatının idarə etməsində yeni keyfiyyət səviyyəsinə çatdırılması ilə bağlı təklif olunan həlləri yüksək qiymətləndirib.
"PANDA sisteminin bir sıra dünya ölkələrində uğurlu istismar edildiyini nəzərə alaraq, Hava Hərəkəti Təhlükəsizliyinin Təminatı üzrə Avropa Təşkilatı (EUROCONTROL) R.I.S.K. şirkətini aeronaviqasiya məlumatları mübadiləsinin yeni standartlarının hazırlanması üzrə işçi qrupuna dəvət edib" - məlumatda deyilir.
R.I.S.K.Şərqi Avropa regionunda bu sahəyə dair kompleks həllər irəli sürən yeganə qurumdur. Şirkətin yüksək texnoloji yenilikləri bəzi dünya ölkələrində geniş yayılıb və yüksək keyfiyyəti və etibarlığı ilə fərqlənir.
Ümumdünya Konqresi bu sahədə işləyən dünya provayderləri, uçuş prosedurları hazırlayan mütəxəssisləri və aeronaviqasiya xəritə naşirlərini birləşdirir.
Tədbirin əsas məqsədi - dünya miqyasında aeronaviqasiya məlumat xidmətləri inkişafını əlaqələndirmək və onun istifadəçilərinin tələbatını ödəməkdir.