Bakı. İlhamə İsabalayeva - Trend:
Son dövrdə vətəndaşların sosial rifahının yaxşılaşması istiqamətində bir sıra islahatlar aparılıb, işlər görülüb və görülməyə davam edəcək. Prezident İlham Əliyev şəxsən buna təminat verdi və bu, insanların sabaha inamını daha da artırdı. Bunu Trend-ə politoloq Nəzakət Məmmədova deyib.
Onun sözlərinə görə, Prezident İlham Əliyev iqtisadi və sosial məsələlərlə bağlı keçirdiyi müşavirdə çox maraqlı, aktual, bütün Azərbaycan xalqı üçün vacib, taleyüklü məsələlərə dair mövqeyini bildirdi:
"İnanıram ki, orada səsləndirilən fikirlər, nəzərdə tutulan işlər əhalinin ürəyindən oldu. Çünki bunlar xalqın hər bir təbəqəsini, hər bir ailəni, Azərbaycan vətəndaşını düşündürən məsələlərdir. Prezident haqlı olaraq qeyd etdi ki, ölkədə iqtisadi, makroiqtisadi vəziyyət sabitdir, manatın məzənnəsi bir ildən çoxdur ki, sabit olaraq qalır, inflyasiya ən aşağı səviyyədədir. Bütün bunlar isə görülmüş işlər nəticəsində mümkün olub və sosial və iqtisadi islahatlara alternativ yoxdur. Dövlət başçısı vurğuladı ki, 2019-cu ilin sonrakı aylarında da çox ciddi islahatlar aparılacaq və dərinləşdiriləcək ki, ölkəmizin hər bir sahəsində inkişaf, tərəqqi olsun, vətəndaşlar daha da yaxşı yaşasınlar".
N.Məmmədova əlavə edib ki, sosial rifahın yaxşılaşması istiqamətində həyata keçiriləcək tədbirlərdən biri də problemli kreditlər məsələsidir. Son dövrlərdə hakimiyyət əleyhinə qüvvələr bu məsələni manipulyasiya vasitəsinə çevirmişdi:
"Prezident çıxışında buna da aydınlıq gətirdi və vurğuladı ki, həmin məsələ artıq neçə vaxtdır ki, müzakirə olunur, hökumət üzvlərinə müvafiq göstərişlər verilib və artıq ötən ildən başlayaraq çox fəal iş aparılır, təkliflər paketi hazırlanır. Şübhə yoxdur ki, bu məsələnin həll də vətəndaşların rifah halının yaxşılaşmasına səbəb olacaq. Dövlətimizin başçısının da qeyd etdiyi kimi, bu, ilk növbədə, ciddi sosial təşəbbüs kimi qəbul edilməlidir.
Onu da qeyd edim ki, bəzi ölkələrdə bu cür sosial proqramlar, nəhəng sosial paketlər adətən seçkiqabağı dövrə təsadüf edir və seçkilərdə səs qazanmaq ücün hakimiyyət tərəfindən manipulyasiya vasitəsi kimi istifadə edilir. Məsələn, bəzi qüvvələrin tez-tez istinad etdiyi Gürcüstanda bu kreditlərin əhaliyə güzəştə gedilməsi aşkar surətdə seçkiyə təsir vasitəsi idi. Azərbaycanda isə bu, gördüyümüz kimi, heç bir siyasi məqsəd daşımır və sırf əhalinin sosial durumunu yaxşılaşdırmaq üçün Prezident İlham Əliyevin elan etdiyi kimi, 2 milyon 200 min əhalinin dövlətin sosial təşəbbüslərinin icrasından böyük dərəcədə faydalanması planının mühüm tərkib hissəsidir və Azərbaycan dövlətinin güclü siyasi iradəsinə söykənir".