Azərbaycan, Bakı, 4 fevral /Trend/
Almaniyanın xarici işlər naziri Frank-Valter Ştaynmayer Ukrayna hökumətini müxalifətlə münaqişədə siyasi həlldən imtina edəcəyi təqdirdə, sanksiyalar tətbiq etməklə hədələyib.
Trend-in çərşənbə axşamı RBK agentliyinə istinadən verdiyi məlumat görə, nazir qeyd edib ki, Ukrayna hökumətinə qarşı qətiyyətlə çıxış etmək lazımdır.
Bununla belə, Almaniya Kansleri Angela Merkel bildirib ki, Kiyevə qarşı sanksiyalar tətbiq etmək məsələsini hələ nəzərdən keçirmir.
Xatırladaq ki, Ukraynada etiraz aksiyaları ötən ilin noyabr ayında Nazirlər Kabinetinin avrointeqrasiya barədə danışıqlara fasilə verilməsi barədə açıqlamasından sonra başlayıb. Müxalifətin yanvarın 19-da Kiyevdə keçirdiyi növbəti xalq nümayişi zamanı radikallarla hüquq mühafizə orqanlarının əməkdaşları arasında qarşıdurma yaranıb. İştişaşlar nəticəsində 3 nəfər həlak olub. Müxalifət hökumətin istefasını və avrointeqrasiyanın davam etdirilməsini tələb edir.
Ukrayna Prezidenti Viktor Yanukoviç Nikolay Azarovun Baş nazir vəzifəsindən azad edilməsinə dair fərman imzalayıb. Fərmana əsasən, Nazirlər Kabineti də istefaya göndərilib. Hazırda Baş nazirin səlahiyyətlərini Baş nazirin I müavini Sergey Arbuzov icra edir.