Bakı. Trend:
Yəmənin cənub-qərbində hökumətyönlü qüvvələrlə İranyönlü husilər arasında şənbə günü günortadan bazar günü səhərədək baş verən toqquşmalarda 140-dan çox insan həlak olub.
Bu barədə hər iki tərəfdəki mənbələr AFP-yə bildiriblər.
Səudiyyə Ərəbistanının dəstəklədiyi qüvvələrin iki hərbi rəsmisi onların sıralarında 84 əsgərin, əsasən raket hücumları nəticəsində öldüyünü bildiriblər. Husilər tərəfdən olan dörd mənbənin məlumatına görə, eyni müddət ərzində 57 üsyançı öldürülüb.
Yəmən iyul ayında yenidən müharibəyə cəlb olunub və fevralın sonunda ABŞ və İsrailin İrana qarşı başladığı hücumun səbəb olduğu regional münaqişəyə cəlb edilən sonuncu ölkə olub.
Həmin vaxt Ər-Riyadın hava zərbələri husilərin nəzarətində olan Səna hava limanını hədəfə alıb. İran Səudiyyə Ərəbistanının icazəsini almadan üsyançı nümayəndə heyətini daşıyan təyyarəni bu hava limanına göndərmişdi. Səudiyyə Ərəbistanı Yəmənin hava məkanına nəzarət edir.
Bundan sonra husilər Səudiyyə Ərəbistanına dəniz blokadası tətbiq edəcəklərini açıqlayıb və krallığın gəmilərini, eləcə də ərazisindəki obyektləri, o cümlədən neft emalı zavodunu hədəfə almağa başlayıblar.
