Bakı. Elçin Mehdiyev - Trend:
Bu gün Bakıda velosiped idmanının BMX növü üzrə dünya çempionatına start veriləcək.
Trend-in məlumatına görə, iyunun 9-dək davam edəcək dünya çempionatında 43 ölkədən 1500-dək velosipedçi birincilik uğrunda mübarizə aparacaq.
Dünya çempionatında Azərbaycanı 8 idmançı təmsil edəcək. “Challenge” kateqoriyasında yarışacaq velosipedçilərimizdən Xəyal İbrahimov, Soltan İsrafilov və Justinas Pavlovas mübarizəyə iyunun 6-da qoşulacaqlar. İyunun 7-də Orxan Məmmədov, Vüqar Nəsibov, Kənan Babayev və Yelmar Şahmarzadə çıxış edəcəklər. Elit kateqoriyasında yarışacaq Aqşin İsmayılov isə iyunun 8-də start xəttinə çıxacaq.
Velosiped idmanının Olimpiya növü olan BMX üzrə dünya çempionatı Azərbaycanda keçiriləcək sayca dördüncü dünya çempionatıdır. Prezident İlham Əliyevin 2017-ci il 15 noyabr tarixli sərəncamı ilə dünya çempionatının Bakıda layiqincə keçirilməsini təmin etmək məqsədilə Təşkilat Komitəsi yaradılıb. Sərəncama əsasən, Baş nazirin birinci müavini Yaqub Eyyubov Təşkilat Komitəsinin sədri təyin edilib.