Azərbaycan, Bakı, 5 avqust /Trend, müxbir K.Zərbalıyeva/
Azərbaycanın İsmayıllı rayonundakı meşələrdə baş verən yanğın söndürülüb.
İsmayıllı rayon icra başçısının müavini, Fövqəladə Hallar Komissiyasının sədri Rəfael Əhmədov cümə axşamı Trend-ə bildirib ki, Şahdağ Milli Parkının ərazisi hesab olunan meşələrdə yanğın canlı qüvvə və helikopterin köməyi ilə söndürülüb. Əhmədov deyib ki, yanğın 4-5 ha sahəni əhatə edib.
"Artıq elə bir təhlükə yoxdur. Yanğın söndürülüb, yanmış ərazilərdə tüstülənmə var", - komissiya sədri vurğulayıb.
Əhmədov bildirib ki, Fövqəladə Hallar Nazirliyinin 200-ə yaxın xilasedicisi, 300-ə yaxın yerli sakin ərazidə yanğının söndürülməsinə cəlb olunub.Yanğının söndürülməsində dünən FHN-in helikopterlərindən də istifadə edilib. Ərazi dağlıq zonada yerləşdiyindən, yanğının söndürülməsində texnikanın işləməsi qeyri-mümkündür.