Azərbaycan, Bakı, 2 sentyabr /Trend, müxbir H.Bağırov/
Azərbaycan paytaxtında ağır yol qəzası baş verib.
Daxili İşlər Nazirliyi mətbuat xidmətindən Trend-ə verilən məlumata görə, dünən axşam Qaradağ rayonu ərazisində Vaqif Məmmədovun idarə etdiyi "Ford" markalı mikroavtobus Ələt qəsəbə sakini Anar Əzimovun idarə etdiyi "VAZ-2107" markalı avtomobillə toqquşub.
Nəticədə, Əzimov və sərnişini - Ələt qəsəbə sakini Valeh Gərayev hadisə yerində ölüb. Xəsarət alan digər sərnişinlər - Əziz Əzizov, Elgün Mustafayev, həmçinin, "Ford" markalı mikroavtobusun sürücüsü Vaqif Məmmədov və sərnişinləri - Kiçikxanım Bünyatova, Zərifə İsmayılova, Pərviz Hümbətov, Rəna Xudaverdiyeva, Eldar Cabbarov və Samirə Zamanova yaralanıblar.
Yaralılar xəstəxanaya yerləşdiriliblər, vəziyyətləri qənaətbəxşdir.
Faktla bağlı araşdırma aparılır.