RED. əlav.: Dünyasını dəyişən zəvvarlar barədə məlumat əlavə olunub
Azərbaycan, Bakı, 23 noyabr /Trend, müxbir K.Zərbalıyeva/
Həcc ziyarətindən qayıdan Şamaxı rayonunun axundu ötən gün yol qəzasında dünyasını dəyişib.
Qafqaz Müsəlmanları İdarəsinin (QMİ) mətbuat xidmətinin rəhbəri Rəhimə Dadaşova çərşənbə axşamı Trend-ə bildirib ki, QMİ Qazılar Şurasının üzvü, qazı Mustafa Məmişov ziyarətdən sonra Şamaxı rayonuna qayıdarkən yolda avtomobil qəzasına düşüb və aldığı xəsarətlərdən dünyasını dəyişib.
Bu il Həcc ziyarətində iştirak edən 3 azərbaycanlı zəvvar vəfat edib. Onlardan Duha Məmmədova Məkkədə, Xanbala Atakişiyev Suriyanın Şam şəhərində vəfat ediblər.
68 yaşlı Mafi Nəzərov isə Həccdən qayıdarkən Suriyada dünyasını dəyişib.
Bu ilki Həcc ziyarətində 2000 azərbaycanlı zəvvar iştirak edib. Bu il Azərbaycandan müsəlmanların Həcc ziyarəti üçün ümumilikdə 2000 nəfərlik kvota ayrılıb. Zəvvarların 1200 nəfəri avtobus, 800 nəfəri isə təyyarə ilə Həccə gediblər.