Azərbaycan, Bakı, 28 noyabr /Trend, müxbir X.Murtuzayeva/
Avstraliyada uşaqlarda cırtdanlığın aradan qaldırılmasına kömək edə biləcək yeni vasitə sınaqdan keçirilir. Avstraliyanın Merdok Uşaq Elmi-Tədqiqat İnstitutu axondroplaziyaya qarşı dərmanın yoxlanması üzrə beynəlxalq proqramda iştirak edir. Bu barədə Trend Rusiya KİV-ə istinadən məlumat verir.
Qeyd edək ki, axondroplaziya genetik mutasiya nəticəsində yaranan xəstəlikdir. O, həmçinin Parro-Mari və anadangəlmə xondrodistrofiya xəstəliyi kimi də tanınır. Bu irsi xəstəlik enxondral sümükləşmə proseslərində pozuntulara təhrik edir. Öz növbəsində, sümüklərin inkişafdan qalması və onurğa kanalının stenozu cırtdanlığa səbəb olur.
Unikal dərman, həmçinin Birləşmiş Ştatlarda, Parisdə və Londonda yoxlanılır. Preparatın hazırlanmasında sümüklərin artmasını nizama salan təbii insan peptidindən istifadə olunur. Onun istehsalçısı qismində "BioMarin" şirkəti çıxış edir.
Tədqiqatçılar əvvəlcə 4-9 yaşlı xəstə uşaqların böyüməsini təhlil edəcək, sonra isə preparatın qiymətləndirilməsi ilə məşğul olacaqlar.
Alimlər ümid edirlər ki, onlar pasiyentlərdə həddən artıq aktiv mutasiya etmiş genləri sakitləşdirməyin öhdəsindən gələcəklər. Onurğa problemlərindən başqa, bu diaqnozun qoyulduğu insanlara həm də dizlərdə, çanaq-bud oynaqlarındakı ağrılar əzab verir. Onların sözlərinə görə, dərman insanlara yalnız normal boy artımı hədiyyə etmir, həm də oynaqlarda və onurğada əməliyyatların aparılması zərurətinin aradan qaldırılmasına xidmət edir.