Azərbaycan, Bakı, 06 mart / Trend ", müxbir İ.Əlizadə/ Azərbaycan Silahlı Qüvvələri ermənilərin mövqelərinə hücum etməyib. "Azərbaycan sülh prosesinə sadiqdir və Dağlıq Qarabağ münaqişəsinin sülh yolu ilə həll olunmasına çalışır" - deyə cümə axşamı NATO Parlament Assambleyasının 68-ci "Rous-Rout" seminarında çıxış edən Azərbaycan Parlamentinin sədri Oqtay Əsədov bildirib.
Ermənistan Silahlı Qüvvələrinin bölmələri martın 4-də səhər saatlarından başlayaraq növbəti dəfə atəşkəs rejimini pozublar. Bunun nəticəsində də cəbhənin bir neçə istiqamətində vəziyyət gərginləşib. Azərbaycan Müdafiə Nazirliyinin rəsmi məlumatına görə, martın 4-5-də atəşkəsin pozulması nəticəsində Ermənistan Silahlı Qüvvələri 12 hərbçisini itirib, 15 əsgəri isə yaralanıb. Döyüşlər zamanı Azərbaycan Milli Ordusunun 4 əsgəri şəhid olub. Hazırda qoşunların təmas xəttində nisbi sakitlikdir.
Əsədov qeyd edib ki, Ermənitsan tərəfinin Azərbaycan ordusunun hücuma keçməsi haqqında yaydığı məlumatlar həqiqətəuyğun deyil: "Belə məlumatların yayılması, Ermənistanda hakimiyyətdə olan qüvvələrin antidemokratik mahiyyətini bir daha sübut edir". Spiker vurğulayıb ki, Ermənistan hakimiyyəti belə təxribatlar törətməklə diqqəti ölkədə yaranmış böhranlı vəziyyətdən yayındırmağa çalışır.