Azərbaycan, Bakı, 28 dekabr /Trend, müxbir M.Əliyev/
Azərbaycan nümayəndə heyəti ATƏT Parlament Assambleyasının qış sessiyasında Dağlıq Qarabağ münaqişəsi ilə bağlı qətnamənin qurumun yaz sessiyasında müzakirəyə çıxarılmasına çalışacaq. Bu barədə çərşənbə axşamı Trend-ə Azərbaycanın ATƏT PA-dakı nümayəndə heyətinin üzvü Eldar İbrahimov bildirib.
Onun sözlərinə görə, ATƏT PA-nın qış sessiyasında Minsk qrupunun qeyri-qənaətbəxş fəaliyyəti ilə bağlı fikirlərin bildirilməsi ilə yanaşı, ATƏT PA-da Dağlıq Qarabağla bağlı konkret qətnamənin qəbul olunması vurğulanacaq.
ATƏT PA-nın qış sessiyası fevralın 23-25-də Avstriyanın paytaxtı Vyanada keçiriləcək.
İbrahimov bildirib ki, ATƏT PA-nın Dağlıq Qarabağ üzrə sabiq xüsusi nümayəndəsi Qoran Lenmarkerin vəzifəsinin boş qalması bu işdə problem yaradır.
"Hazırda bu vəzifəyə ədalətli, Dağlıq Qarabağla əlaqədar məsələni ATƏT PA-da qaldırmağa qadir olan şəxsin təyin olunmasında maraqlıyıq", - o, deyib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.
