Azərbaycan, Bakı, 4 oktyabr /Trend, müxbir E.Mehdiyev/
Təhsil, Elm və Mədəniyyət Məsələləri üzrə İslam Təşkilatı (İSESKO) Azərbaycanın işğal olunmuş ərazilərini qaytarmaq hüququnu qətiyyətlə dəstəkləyir. Trend-in məlumatına görə, bunun cümə axşamı Bakıda öz işinə başlayan II Beynəlxalq Humanitar Forumun açılışında qurumun baş direktoru Əbdüləziz bin Osman əl-Tüveyrci bildirib.
"Bu işğal beynəlxalq hüquqa, BMT Təhlükəsizlik Şurasının qətnamələrinə və tarixin özünə ziddir", - o deyib.
İSESKO-nun baş direktoru forumda iştirak edən ölkələri işğal olunmuş ərazilərin bərpasında Azərbaycanın mövqeyini dəstəkləməyə çağırıb.
"Azərbaycan ərazilərinin işğalı qanunsuz və ədalətsizdir", - o əlavə edib.
Əl-Tüveyrci bildirib ki, Azərbaycanın işğal olunmuş ərazisində aeroportun tikintisi qanunsuzdur.
"Bu ərazi tarixən, mədəni və hüquqi baxımdan Azərbaycan torpağıdır", - o qeyd edib.